كورنەكتى قازاق ەنەرگەتيگى شاپىق شوكين – قازاقستان ەنەرگەتيكاسىن دامىتۋعا ارنالعان «قازاقستان ەنەرگەتيكاسى», «اۋىلشارۋاشىلىعىن ەنەرگيامەن قامتاماسىز ەتۋدىڭ عىلىمي نەگىزدەرى», «قازاقستان ەنەرگەتيكاسىن دامىتۋدىڭ نەگىزدەرى», «ەنەرگەتيكا جانە قازاقستاننىڭ سۋ شارۋاشىلىعى», «قازاقستاننىڭ جىلۋ-ەنەرگەتيكالىق بالانسى» سياقتى 500-دەن اسا عىلىمي ەڭبەكتىڭ اۆتورى. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ 1996 جىلى اكادەميك شاپىق شوكينگە «حالىق قاھارمانى» اتاعىن بەرگەن بولاتىن.
ەسكەرتكىشتىڭ اشىلۋ راسىمىنە قاتىسقان الماتى قالاسىنىڭ اكىمى باۋىرجان بايبەك شاپىق شوكيننىڭ جاڭاشىل عىلىمي ەڭبەكتەرى ارقىلى ءوز كەزەڭىنىڭ قوعامدىق سانانى جاڭعىرتۋشىسى بولعاندىعىن اتاپ ءوتتى. «ول قازاق ەنەرگەتيكا عىلىمي- زەرتتەۋ ينستيتۋتىنىڭ العاشقى ديرەكتورى بولدى. اكادەميك شوكين باسقارعان كەزدە ينستيتۋت ەلىمىزدەگى قۇندى ەكسپەريمەنتالدى بازاسى بار, ءتىپتى كەيبىر زەرتتەۋلەرى بويىنشا الەمدە بالاماسى جوق ءىرى ءارى جاڭاشىل عىلىمي مەكەمەگە اينالدى. قازاقستاننىڭ ەنەرگەتيكا سالاسىنداعى عىلىمي جاڭالىقتارىنىڭ بارلىعى وسى ينستيتۋتپەن بايلانىستى. شاپىق شوكيننىڭ تىكەلەي ارالاسۋىمەن قازاقستان ەنەرگەتيكاسى عىلىمي-تەحنيكالىق بولجامىنىڭ كەشەندى جۇيەسى, ەرتىس-قاراعاندى كانالىنىڭ, قاپشاعاي گيدروەلەكتروستانتسياسىنىڭ جوبالارى جاسالدى», – دەدى الماتى اكىمى.
ءبىرشاما ۋاقىت بۇرىن الماتى اكىمدىگى شاپىق شوكين ەسكەرتكىشىنىڭ ۇزدىك ەسكيزىنە اشىق بايقاۋ جاريالاپ, سول بايقاۋدىڭ ناتيجەسىندە, قازاقستاندا قويىلاتىن ەسكەرتكىشتەر مەن مونۋمەنتتەر جونىندەگى مەملەكەتتىك كوميسسيا شەشىمىمەن قازبەك جارىلعاپوۆ پەن ميرلان ازماعامبەتوۆ جاساعان ەسكيز ۇلگىلەرى ۇزدىك دەپ تانىلعان ەدى.
سالتاناتتى شاراعا اكادەميكتىڭ ۇلى قانات شوكين, ەنەرگەتيكا عىلىمي-زەرتتەۋ ينستيتۋتىنىڭ پرەزيدەنتى حالىق ابدۋللاەۆ, الماتى قوعامدىق كەڭەسىنىڭ توراعاسى راحمان الشانوۆ, ارحەولوگ عالىم كارل بايپاقوۆ, الماتى ءماسليحاتىنىڭ دەپۋتاتى نۇرلان مۇحامەد-راحيموۆ, جازۋشى بەكسۇلتان نۇرجەكەەۆ, عىلىمي-زەرتتەۋ ينستيتۋتىنىڭ قىزمەتكەرلەرى مەن ارداگەرلەرى قاتىستى.
ميرا بايبەك,
«ەگەمەن قازاقستان»
